一塊雞片試真情

對面的唐狗兄弟有幾friend，有幾「老死」，有無義氣，有冇扎鐵工人咁團結？我唔知。我迪奇只係知道，就是平日幾好的兄弟，一講到食，就兄弟都無情講。

昔日，金毛尋回犬阿高未跟婆婆去屯門住之前，成日搶細佬小黑的食物，我媽媽每次在二樓各拋一塊雞片給牠兩，阿高會極速吞入肚，小黑則一執到立刻找個安全地方才驚驚青青地慢慢啃。事實上，肥高經常將雞片從小黑口中搶走，以顯大哥地位。

而我和蘇菲，雖然係一家人，但一樣無情講，我們亦多次在早上開餐時開戰，導火線是貪心的蘇菲吃過界。為保食糧，戰火一觸即發，混戰一輪後，有時我的嘴角會淌血，蘇菲則完好無缺！梗係，我識得就住咬，蘇菲就真的大口大口的咬，死惡婆！

看到這裏，你應該估到媽媽計劃今天用一塊雞片試下對面惡唐狗的兄弟情，結果一定是扮大佬的牠搶了細佬小黑狗的雞片啦！

對不起，今天未有結果，媽媽因昨天去了會展的美食展及醫院聯展，在人多擠逼寸步難行又要孭住裝有文件、香蕉和橙(免費派送)，還有五包台灣美味香腸的購物袋，累得她兩邊膊頭痠痛雙腿又發麻再加整個星期睡眠不足致精神萎靡，今天，她宣告大昏迷。測試？明天再續。




ZZZZZZ.......