2014年1月16日 星期四
2013年11月10日 星期日
2007年8月22日 星期三
屁股五粒「的」
物價高漲，世界難捱呀！
最近才學識買嘢前格價的媽媽，成個月沒去超市大掃貨，周日為了一次過攞雙倍印花換貓換狗畀我哋玩和咬，在惠康掃了一車貨回來，方才發現最愛的梅林牌B2午餐肉由大約八個幾漲到十三個九，而一向買開的緣巨人粟米亦由八個半變成十個幾，前者加咗五蚊，漲幅超過五成，認真唔講得少！
超市糧油格價升，餐廳食物也跟住升。媽媽經常幫襯的茶餐廳，超豐富早餐包沙爹牛米+火腿蛋牛油包+奶茶上星期才不過十七蚊，今朝漲至十八蚊！而另一間在公司附近常幫襯的，每個餐亦漲一至三蚊！
唉，樣樣都加，係媽媽的人工無得加，幸好我們的伙食有抗通脹能力，不受物價影響，而且只會加，不會減。不過是否有得加，由迪奇哥哥的健康狀況決定。
記得上年冬天媽媽每星期都豪氣地去雞檔話要劏隻雞，或去牛肉檔斬一斤超濃味新鮮肥牛，前者清蒸去皮拆骨再手撕，後者白灼剪粒去肥膏，吃得我們舔舔脷。後來因有指吃得太多蛋白質對狗狗身體不好，加上迪奇哥哥那年冬天勁甩毛，媽媽懷疑與此有關，於是停了新鮮美食。
昔日我們亦常吃脆脆雞條，後亦因迪奇哥哥皮膚敏感而停食。
肉類不能常吃，那就常吃生果，冰凍西瓜、溫室密瓜、哈密瓜、皺紋瓜在夏日絕不缺。而這陣子媽媽在西田超市發現曾經絕跡一時屁股有五粒「的」的「美國紅地厘蛇果」，咬下嗖一聲兼清甜無比，四個裝只售十八元八角，我們吃完一包，媽媽急急再入貨。
咦，媽媽又在廚房批皮了，我閃~~~~
2007年7月31日 星期二
青森來的棒球密瓜
媽媽放假第二天，天氣酷熱依舊，仍然三十幾度熱死狗無命賠(雖然朝早灑過幾滴雨，但不足以降温)，不宜外出行街被無情毒太陽亁烤，咁我們陳家迪奇與蘇菲到底有何消暑良方呢？
答案是，登登登~~~~~~你都睇到啦，媽媽今天為我們帶來日本青森懸的棒球密瓜，外皮白白地色兼滑溜溜，和阿笨與阿占在公公家千辛萬苦運回爸爸家的皺皮紋密瓜不同，亦不是傳聞中好甜好甜的夕張密瓜(這種好貴的，媽媽話响citysuper賣成三百幾蚊一個)。
這個青森懸來的密瓜，放在雪櫃內冰了一整天，晚飯時間出埸，唔，我估一口吞下應該透心涼！
和平時一樣，媽媽在廚房切切切時我們已伏在地上痴痴地等。經過上次我地連皮都吞埋的猴摛食法後，佢證實我地係唔識「刨密瓜」，因為我地唔係「西瓜刨」亦無「密瓜刨」因為史納莎無哨牙，媽媽切完圖中哈哈笑形密瓜片後，仲要去皮兼粒粒，然後你一塊呀我一件呀蘇菲一口呀咁三口子一齊食囉。
睇到呢度，你一定會問，咁青森密瓜好唔好食吖？答案係──「清─甜」，媽媽又扮晒食家咁話喎！
佢話，頭幾啖入口好清，但食多幾口就唔覺甜，而且無厘密瓜味。佢記起佢個食家老細梁家權(呢，專寫菠蘿包碗仔翅同麥芽糖嗰個呀！)講過：「日本水果得個甜字，但無乜果味，好似宮崎杧果就甜得黎無杧果味。」
但係，呢個青森來的密瓜連甜味都無乜喎，唔通媽媽被搵笨？青森最出名的是蘋果，佢就買個密瓜番黎，睇黎都係畀人昆！
其實都無所謂啦，食乜我地都咁捧場，咁開心。我迪奇唔揀飲擇食，蘇菲就更饑不擇食，連生勾勾的西蘭花都走去噬兩啖！媽媽，請給我們不甜的西瓜密瓜乜乜密密瓜.
鹿兒島和牛之味(二)
.
.........，當媽媽在廚房煎煎切切時，我地已經雙雙坐在廚房以亮晶晶又水汪汪的盼望眼神等候，期間牛扒釋出的香味令我哋不停lam脷兼吞口水，快啲啦，得未呀！
Well，大約半小時後，美食終於端到我們的專用餐桌前，我們出名是「速食」怪獸，當飯兜一放下我們便以九秒九極速吃完！嘩，正！
不要以為我們狼吞虎嚥便食不知其味，其實我們絕對分得出好味與唔好味。話你知，我們犬界對於食物的訐價，是以「食速」來計算的！對於超好味的食物，我們「食速」是九秒九(每五十克)，好味的就十秒十，普通的十一秒十一，少少好味就十二秒十二咁如此類推囉！吓，複雜？咁簡單的數你都唔識計，死蠢！
咁，人的評價又何呢？媽媽扮晒食家咁同我地講：「鹿兒島來的和牛因為油份高又分佈平均，所以入口時甘香無比，而她又煎到啱啱好，外層香脆內層肉質嫩紅可謂滑不留口！不過，論到牛味，還是美國的肉眼扒好味。」
咁，下次仲食唔食？你食啦！你食我地就有得食！而且我地食乜都無所謂，理得佢係乜牛物牛。請問，聽日可唔可以食ribeye呢？三成熟吖唔該！
鹿兒島和牛之味(一)
一年一度，媽媽又放年假了。
「放假你去邊度玩呀？」在她交待放假期間的工作安排時，身邊的人總這樣問她。這句說話的潛台詞是──「你去邊個國家玩」。彷彿，一放大假就要坐飛機離開香港。若沒坐過飛機離過境，彷彿就沒有放過假。乜香港有怪獸嗎？家裏有鬼嗎？放假一定要離開自己的家，一定要出國嗎？
媽媽才不會呢，她向我們承諾過，在我們年紀還小時，盡量不離開我們自己死去玩。因為她知道，她離家三日，我們便會發癲，又會扮狼叫，又會絕食...為免我地唔開心，她梗唔會自己死去玩。就算要玩，都帶埋我地去啦！希望遲啲有寵物出國旅行團，到時我地一家三口就可以去見吓世面咯。
不過說到見世面，又唔一定要出國喎，好似今日佢放假first day，就去咗鹿皃島──呀，唔係，係去咗日本──百貨店西田──個超市，帶咗一大件日本鹿兒島和牛西冷番來同我地慢慢歎！
嘩，和牛，我迪奇仔咁大個仔都未試過，唔知係咩味呢？唔知有冇上兩年媽媽响新港城街市肉檔買嗰啲打邊爐肥牛，或者鮮嫩牛柳咁好味呢？其實我地都好回味，嗰時幾乎個個禮拜日都有得食，後來因為我勁甩毛，媽媽思疑同食得太多含豐富蛋白質的牛肉有關，就咁，超濃味兼嫩滑牛柳就成為「只能回味」的美食了！
今日，美食重臨，呀，唔係，簡直係從天降臨，我地當然熱切期待.......(待續)
2007年7月18日 星期三
速食
你知道甚麼叫「速食」嗎？不是吃微波爐叮叮食物或是吃個麥當當餐啊！在我們犬界，「速食」有另一解釋。請看以下例子──
我樓下的阿高(金毛尋回犬，現已般往元朗婆婆家住)，曾經創下一口氣吞下直徑約八吋深四吋的大湯碗內的白汁雞意粉，所需時間不詳，據說是牠媽媽上了三樓鄰居處寒暄的幾分鐘吧！當然，牠飽嚐口福後，翌日就有牠好受，拉得一地都是屎！
迪奇哥哥呢，小時候就在籐椅上衣衫雜物堆中找到一包不知何時買回來的澳門特產雞仔餅，又在短時間內把它消滅。由於沒有飲消滯茶，翌日「吽」了一整天，甚麼都吞不下。又有一次，牠看見廚房地上放了幾個長方形的紙盒，於是抓呀撥呀壓呀撕呀的，竟然有些白色甜甜像牛奶的東西漏出來，又以最快速度把它舔清光。
而我呢，有幾次發現垃圾筒內有香香的東西，我就一口咬着垂了一半在外的垃圾膠袋，拉呀扯呀的就可把蓋弄開，在媽媽發現前將香香的東西吃下肚，呵呵呵！
其實我蘇菲的「速食」速度是很厲害的，媽媽曾幫我計時，我大約只需四十秒就可以把一碗切碎的牛扒肉吃掉，比迪奇哥哥快十幾秒呢！
由於廚房有好東西吃，所以每次媽媽在廚房準備食物時，我們都伏在她腳邊，等候最新鮮的食物。就算不是為我們準備的，她偶然不小心掉了一些下來，我們又極速幹掉。
今天晚上，媽媽在廚房切切切，一定又有好東西吃了。看真點，嘩，原來是阿笨與阿占吃得好滋味的密瓜啊！我們有口福了！
咦，怎樣這次媽媽沒有切粒粒，你知我們的犬齒只能撕和切斷食物，但沒有臼齒來磨碎食物，我們只懂吞而不懂咀嚼，你叫我們怎吃呢？但我舔，嘩，好清甜啊，我咬我吃我吞.....喂，你這時才要切粒粒，不，不要取走我的密瓜，我咬咬咬吞吞吞，嘩，把它幹掉了？
甚麼，媽媽你找密瓜皮？咦，有皮嗎，怪不得我剛才吃下時覺得有點粗粗的，啊，弊，明天我會拉肚子嗎？還是會便秘~~~~~~
訂閱：
文章 (Atom)