彭福之初探

嘩，真係好開心，今日係我咁大個女第一次去彭福，心情極度興奮呢！

為免我曬親，我哋未到十點就開車出發啦。

咦，點解無迪奇哥哥份？原來媽媽擔心去到場面混亂，她一人無法分心照顧我倆，如果有大狗發惡就更驚，所以，迪奇哥哥，今次就由我做先頭部隊，睇下重開後的彭福有咩唔同？

抵埗後，這時才十點零，但陽光都幾猛！到咗門口，梗要影張到此一遊相啦！

其實，我蘇菲出世以來都未去過彭福，所以來到後覺得一切都好新鮮！沿路青草處處，又有好多大樹遮蔭，大樹下又有木櫈，媽媽有得坐時我又有時休息。

唔，青草氣息好清新！

噢，樹下探險樂趣多！

行到攰攰哋，休息吓先！

好多樹下都設有木櫈，在此乘涼唔怕曬！

咦，有朋友仔喎？！







這裏就是全場最正位置，有棵好大好大的樹，樹下有一排木櫈，好多狗狗就在這樹蔭下享受涼風，歇歇腳，飲吓水，給爸爸媽媽影吓相，同其它狗狗social吓。

咦，呢位摩天使小姐，做乜聞我？大家都係女仔黎喎！





這裏亦成為沙龍勝景！媽媽，你係咪影我架？乜淨係影到我個頭架？





嗄，嗄，你唔好笑我蘇菲呀又坐低呀，其實我唔係好行得。平日我係人見人愛車見車載，坐車多過行路，真係要行咯，行十分鐘要抖二十分鐘架！

玩到差唔多十一點，陽光愈來愈猛，我蘇菲初探任務完成，係時候番歸同迪奇哥哥報告啦。Bye~

回應 (2)

引用 (0)

永久連結

• 
  • 迪奇與蘇菲
  • 2007年10月4日下午10:27

  金子快d叫媽媽帶你去，勁多靚景，又可以影靚靚相啊！

  回覆
• 
  • Kimchi
  • 2007年10月4日下午7:47

  Kimchi都未去過呀！

  回覆

為慘死史納莎哀悼

好慘呀，我迪奇與蘇菲為慘死於惡狗口下的史納莎默哀一分鐘！

剛才看到其他狗狗網誌，方知早兩日在我家附近的西貢瓦窰頭村口，有兩隻由飼主父母帶去散步的史納莎，途經此處時見有一名男子帶同一頭洛威拿及大狼狗，兩位老人家已經窒了一窒，但對方說「唔駛驚，無事架！」老人家才敢行過去，怎料此時兩頭大狗發惡攻擊其中一隻史納莎，老父想阻止但悪狗連他也想攻擊，老父無力施救，最終由對方狗主拖開惡狗，兩隻史納莎雖然第一時間送院，但被攻擊的一隻已肚破腸穿，傷重不治，另一為救同伴的史納莎亦受了傷。兩老為未能保護愛犬而十分內疚，一想起就禁不住流淚，家中的另一隻更嚷着要找姐姐.....

講到呢度，我哋都好傷心，要停一陣...................

其實我地條村，即係井頭村，之前亦有惡狗咬人，受害人係我哋隔離屋的印傭姐姐，傷人的是我們村口餐廳隔離間屋的兩頭大狼狗，襲擊原因撲朔迷離，印傭姐姐基本上乜都無做過，只係經過佢地大閘，咁當時大閘只係虛掩，狗狗突然撲出黎就咬，真係反應都黎唔切。事後都有報警，同樣係無罰無剩，惡狗無坐監主人無罰款，總之天無眼。而印傭姐姐之後都留下好大陰影，見到我哋都驚驚哋。

係呢度，希望啲有良心的大狗或惡狗飼主好好睇實自己的仔仔囡囡，而身為小狗父母者，亦要好好保護仔女，見惡狗即閃。

而啲無良心、縱容惡狗傷人傷狗的賤精主人，好似之前横行筲箕灣的惡狗主，祝佢哋早啲死──畀車車死或者自己炒車死、畀天上掉下來的竹插死、食魚哽死飲水濁死等等等，以謝天下！

• 
  • 馬莎
  • 2007年10月2日下午10:20

  馬莎都畀大狗咬過兩次, 以前我會任佢同大狗玩的, 但自此之後, 我發覺好多大狗主人都好有問題, 首先係成日同人講自己隻狗好乖, 唔會咬狗, 令其他狗主放下戒心, 咁就造成咬狗事件. 現在我每天都帶馬莎去街, 見到唔熟..

  回覆
• 
  • daimow
  • 2007年10月2日下午2:33

  其實做養大狗的主人, 真的要好自律咁管教d狗狗, 因為真係有攻擊性, 會傷害到人或其他狗狗. 有d主人以自己隻狗好打得而自豪, 而我自明明細細個就唔比佢打架, 我覺得終有一日o個d主人會自食其果 !!!

  回覆
• 
  • 迪奇與蘇菲
  • 2007年9月30日下午12:34

  迪奇與蘇菲媽：我都係！

  回覆

我們的好鄰居

常言道，遠親，不如近鄰，所以話，睦鄰關係搞得好，生活唔會無譜！但係唔係個個有好鄰居個喎！

好彩，我哋就有啦。

媽媽話我知，當日夠膽承諾照顧迪奇哥哥一生，就是因為樓下姜師奶拍心口話：「如果你要公幹，我幫你餵迪奇仔囉！放心喎，有我係度！」

而事實上，當年媽媽媽真係勁出trip，經常一去就四、五日，仲要走得好急，照顧迪奇哥哥之重任就交姜師奶負責咯。佢每日定時定刻上黎餵迪奇哥哥之外，仲有倍佢玩一陣。不過，始終唔見媽媽幾日，迪奇哥哥在第三日開始就開始情緒低落兼無心機食嘢，而媽媽在電話中知道情況後，都會心掛掛。

幸而，我蘇菲到陳家後，媽媽已經唔駛再出trip，而且亦為咗我哋而暫時唔去旅行。

而我哋，都有唔少玩得的鄰居，包括--------

經常在村內巡來巡去，陪人睇樓陪郵差叔叔派信，人稱「小黑隊長」的唐狗小黑啦！





呢兩位呢，係折衷鸚鵡，紅的是女仔，綠的是男仔，又係住樓下的。





佢哋以前仲有好多同屋主，好似白色的大葵花鸚鵡，又綠又黃又藍的金剛鸚鵡，仲有好叻講嘢的灰鸚鵡(兩隻)，不過，都先後病死哂咯。

而下面呢位呢，係最早住响陳家的狗狗──牠是N年前媽媽去泰國玩時買回來的擺設，你看，牠和我們一樣是史納莎呢。看來我們成家陳家寵兒，早有預示。

陳家樂園有幾好玩？

今天媽媽一早起來出露台視察，見沒有下雨，地上沒有濕，風吹樹輕搖，這些初秋涼風真舒服啊！媽媽立即想起不如馬上起程去彭福，然而她想到今天是假期，又是星期三，好可能有馬跑，即刻上網查一查，噢，too bad！真係添！有馬跑即彭福唔開，掃興！

好彩，因為我地住村屋，無街去，都唔會無嘢玩，你睇，陳家樂園幾好玩？！

首先，我哋巡個圈睇吓有無賊先？






好似無喎！








吓，乜你綁住咗出唔到去呀？咁下次先啦！

___________________________________________

咦，對面小黑狗又伸個頭過黎，好想同我蘇菲玩哩！





吓，你好想過黎同我哋住？唉，我都知你畀大佬恰得好慘.......

但愛莫能助，我哋都好忙，好多活動，無乜時間陪你玩，你睇....










最多，下次開party咯，我哋留番啲嘢食畀你呢，好鄰居！


寵物,
消閒嗜好

• 回應 (3)
• 引用 (0)
• 永久連結

• 
  • Whistler
  • 2007年9月28日上午1:06

  住村屋真係好x 3

  回覆
• 
  • 馬莎
  • 2007年9月27日下午1:50

  住村屋真好x2

  回覆
• 
  • Kimchi
  • 2007年9月27日下午12:38

  住村屋真係好！

  回覆

奧斯卡與眼藥水

圓月奧斯卡

昨日八月十五中秋佳節，雖則圓月被雲霧遮掩，天亦驟雨連連，但在月亮姐姐努力爭取下，終歸有幾刻能完全露出俏臉，令我們的中秋BBQ能在圓月高照下舉行，而更開心的是來了一位史納莎賓客，叫Oscar，已經九歲了，是樓下姜師奶妹妹的朋友帶來的，可能因為係獨仔關係，佢唔係好熱衷同我哋玩，大多數時候，係我哋追住佢黎玩。

唔通，佢覺得我哋好煩？

弊，唔記得同奧斯卡影相添！下次補番！

__________________________________________

一支眼藥水

這天，亦是我們陳家的大日子，因為迪奇哥哥做完手術剛好一個月，理應完全康復，但頭兩次覆診都仍有發炎兼眼睛不夠清晰明亮，加上這兩天她發現做完手術的左眼，表面上看來仍是有一層白濛濛似的，而右眼呢，早幾日她在燈光中赫見瞳孔的反映有點淺色，好擔心這隻眼的白內障開始嚴重了。幸好，媽媽的擔心在見完醫生後一掃而空，醫生說：「左眼你見到仍濛濛地，係因為手術後係會持續發炎一段時間，正常的；右眼呢，因為你留意多咗啫，我頭先檢查完，無變嚴重喎。」

「噢，醫生你真係好，祝你中秋節快樂！」媽媽聽後個心安樂晒，而個心亦都同醫生講咗中秋節快樂。藥水方面呢，由兩支減為一支。三個星期後再見啦醫生！

 

• 寵物, 
• 消閒嗜好

颱風過後...

迪奇：媽媽話今日去彭福玩，我一早起身準備。







蘇菲：但係，雨，一直下個不停，點算？







迪奇：瞓陣先囉，等一陣睇吓停唔停雨囉~~~~~~







蘇菲：齋等唔係辦法，不如玩陣公仔先！

迪奇：都好！







迪奇：咦，有可疑人物接近。







蘇菲：係咩？







迪奇：汪汪汪，咩人呀，快啲報上名來！







蘚菲：媽媽，有賊呀！

..............




媽媽：送石油氣之麻....



蘇菲：係咩，我無叫喎~~~~~~~~




媽媽：係人哋叫架....








蘇菲：但都係好悶喎，無街去，我唯有──扮青蛙。







迪奇：咁，我繼續玩瞓覺啦。

盼望晴天

剛剛看到別的狗狗網誌，方發現彭福公園已於上周二重開，嘩，實在太令人興奮啦！

話時話，我蘇菲係未去過彭福的，因為我未出世嘛，但我聽去過的迪奇哥哥講，嗰度真係好大，不但有大片綠草如茵的喪跑園，大大棵可遮蔭的樹，還有大大的池塘，聞說之前同樓下金毛阿高去玩，佢就忍唔住跳咗落水，結果黏到成身浮萍，激到佢阿媽死，沖咗好耐水先沖番乾淨.....而當阿高被罵之時，迪奇哥哥就去咗追哥基兄弟、松鼠黨、西施群，總之，好忙.....

迪奇哥哥又話，嗰度啲狗狗都好友善，任聞籮柚唔發惡，當然啲狗狗主人都係，唔會眼超超，總之就開心啦。媽媽就好鍾意入面小食亭的大熱狗，新鮮熱辣，雖然唔係話好好味，但陪我地玩完佢都好肚餓，唔啪番隻熱辣辣熱狗邊有力車我哋番屋企呀？當然佢開餐時候，迪奇哥哥都有零食。

聽落真係好好玩喎！可惜今日唔去得，因為跑馬日唔開放，但媽媽應承我哋聽日一早就出發，希望唔好落雨啦~~~~

激情冷卻....

都係我蘇菲唔好，搞到迪奇哥哥咁，我唔想架！

其實媽媽你唔好鬧我成日追住迪奇哥哥黎騎，咁我覺得好玩吖嘛！而迪奇哥哥，都唔抗拒喎。如果佢唔鍾意，一個反身就即刻將我制服，點會任由我騎喎？！所以話，佢都鍾意畀我騎住黎玩啫。

不過，我地有時玩得激烈，迪奇哥哥興奮起上黎，支唇膏係會凸咗出黎，有時，更會凸咗好多，而且，久久未能縮番入去，我唔知點解會咁架，真係唔知架~~

今晚，我又唔覺意搞出意外──令迪奇哥哥攤屍响地郁到唔願郁，而支唇膏就好似箍住咗伸唔番入去，媽媽見到又大驚，即刻記起《狗狗急救大全》所講的「箍死啫啫症」，於是拿拿臨找來救急花士令，但搽完後仍沒半點軟下來跡象，媽媽一臉擔心另一臉黑起來責備我好同迪奇哥哥玩到咁癲！

但此事如何收科？媽媽諗住同迪奇哥哥沖凍水涼，在冷水照頭淋下，希望隨激情冷卻後唇膏可以縮番入去，不過，會否弄巧成拙呢？媽媽又想到用零食分散注意力，但迪奇哥哥竟然無反應！最後媽媽抱起牠從廳走入房，然後由房出廳，來回走了幾次分散了牠的注意力後，唇膏終於歸位，好咯！

媽媽，你咪黑起臉鬧我呀，我唔想架────之但係，包鱈魚條已經拿了出來，都剪開咗咯，你唔會收番埋啩，不如我同迪奇幫手食咗佢？OK？

鬼臉的歲月

又快到中秋，你估我哋今年會玩乜？唔，應該會燒嘢食掛！燒乜？燒雞翼、燒牛扒、燒燈籠咁囉！

但係市面好似無乜中秋氣氛播，反而哈囉喂就賣晒廣告！我地對海洋公園個地鐵嘔乜鬼廣告非常讚賞，迪迪尼個就懶嚇鬼，媽媽話條橋舊過N年前的幻海奇情喎！

咁既然萬聖節就到，我地又乘機扮吓鬼，你睇，我哋邊個似啲？

上面，係我蘇菲的「鬼影變幻頭」！

下面，係~~~~~~~~~







我迪奇呢吓叫「大你個死人頭」！呵~呵~

慘遭蹂躪

女人，真係好煩！近排蘇菲好似癲咗咁，日日追住我黎騎，一時又攻我下盤咬我耳仔沒有一刻肯停下來。我雖然正值盛年體力充沛，但都無佢咁好氣，攤屍响地任佢搞，但日日畀佢咁蹂躪，真係命都短幾日。

呢個蘇菲又係巴渣精，我識吓女仔啫，佢即刻勢兇夾狼咁吠走人，搞到無女仔埋到我身，慘！

以為佢好愛我咩，搶起嘢食上黎即刻變仇人，利齒有時割傷我頸，一滴血，就從身上和心上淌下來，痛！

玩拋公仔咩，明明係我接到先，佢又夾硬從我口中搶走，狼！

佢有時又會扮晒乖，坐定定露出盼望的眼神等人將食物奉上，奸！

不過，佢都唔衰得晒，我養病嗰陣，雖然佢被困在欄柵內，但會乖乖伏在地上與我遙遙相對陪伴我；而佢知道帆布椅係我私家櫈，佢都無同我爭，自己乖乖伏在櫈底；晩上睡覺嗎？她知道我喜歡睡牀頭枕住媽媽的手，她就永遠睡牀尾枕住媽媽的腳，算佢啦！

But，今晚唔該畀我抖一抖，唔好再騎我，OK？

食力強勁

蘇菲：“你睇唔睇到我舊骨喺邊？”







迪奇：“擦擦擦，向上擦，向下擦....”



嘩，有食神，今天媽媽為了獎勵我們乖乖，又或是慶祝迪奇哥哥眼睛康復情況理想，還有中秋節就到心情靚靚...總之有千萬個理由食好嘢，所以今日有三包新零食勒！

其實媽媽體內流着帶購物狂基因的血，成日會忽然買好多嘢番黎，所以我哋都唔驚訝！

今日三包零食都係鱈魚雞粒、鱈魚雞條同潔齒骨，其實都唔係咩新嘢，全部食過晒，證實不會引起迪奇哥哥皮膚敏感，媽媽才放心大包大包的買。

有好多嘢我們是禁食的，例如美味脆脆雞肉條、香味濃郁但幾油的煙燻牛骨、風乾豬耳、牛奶骨等，前者媽媽思疑雞肉係迪奇哥哥的致敏原，其餘媽媽覺得油淋淋兼食到好污糟，早已戒食。

另外有隻韓國出的勁香雞肉片(中間有蕃薯/紅蘿蔔乾)我哋都好鍾意食，但因為係雞，所以都要少食。

雖然唔係樣樣有得食，但我哋依然好有「食力」。人哋食一條四吋長潔齒骨要成幾個字(即十幾廿分鐘)，我地就一兩分鐘吔完，而我蘇菲就更強，比迪奇哥哥快三分一！

不過，媽媽對我的「食力」並不欣賞，佢見我唔多咀嚼監粗咁吞食物落肚，成日鬧我小心哽死！

計我話：無得食就死！

惡女當道！

哎呀，今日天氣真係差到極呀，灰濛濛一片搞到媽媽以為自己有白內障添。對此，我哋都好唔鍾意，因為一開露台門即有熱氣攻入，空氣中好似好多塵好多懸浮粒子咁，總之吸啖氣都覺得好混濁(請記住，我哋住西貢村屋，空氣應該好啲啲，但都係咁差喎！)，媽媽忍唔住即刻關上露台門，都是躲在冷氣間較舒服，至少，我地喪玩時大口大口的吸氣都不會被空氣的灰塵濁親吖！

尋日話有金毛尋回犬在將軍澳咬親人，今天報紙有報導，原來係主人即將去旅行，於是請兩位朋友幫忙照顧，誰知朋友正蹲下和金毛打招呼，牠就即刻發狂咬人。計我蘇菲話，梗係個主人這段時間在家執拾行李好似好興奮咁，又或者佢同朋友通電話安排人來照顧牠持，金毛看在眼裏誤會主人不要牠，所以朋友一來咯，牠就先下口為強！

其實我哋都相信，狗狗應該不會輕易咬人。我們有媽媽錫食好住好病病又悉心照顧，無憂無慮開開心心又過一日，完全沒有咬人動機。我估佢地梗係有啲原因，例如最近心情煩躁，或有心事，又或身體唔C服，又可能以前有過不愉快經歷等等等。

至於另有一單新聞指一頭Pointer獵犬因被其餘兩隻兄弟搶食物，混亂中誤咬主人，這又當別話。講到搶食呢回事，真係兄弟父子兩公婆都無情講，我試過好幾次想偷食迪奇哥哥的狗糧，次次都畀佢趙番轉頭，不過佢兇咩我都夠狼，好多時一輪混戰後，媽媽發現迪奇哥哥身上有血，但我無喎！即係我有時狼起上黎真係會唔小心咬到佢，但迪奇哥哥就成熟有分吋，從來都只係咬皮唔咬肉，識得就住，所以我就無傷囉！

所以話呢，你唔好睇少我呀，我雖然係少女，但發起惡時絕對不好惹，從來只有我蝦人，沒有人蝦我，所以你哋會經常見到我騎住迪奇哥哥黎玩及ung，而好少見佢騎我！哈哈，下次見到我，請別惹我，唔係你就知味道.....

喪玩六十分鐘

真的是多事之秋啊，因為已經立了秋嘛！

媽媽說今天有好多有關狗狗的新聞呢！其中一單勁搞笑的就發生在媽媽公司附近的筲箕灣東大街，一隻髮型屋的唐狗「得仔」昨晚凌晨因貪玩被卡住在鐵通與牆壁間，要勞煩消防叔叔剪斷鐵通才能脫身；另外金毛阿柑因隱睪症要施手術，有人藉此在網上發起募捐來呃錢；最後一單，今日下午，將軍澳有隻金毛發狂咬傷三人...又係金毛咬人呀！媽媽真係開始懷疑，唔通金毛本性唔係咁純良，定係主人教得唔好呢？但明明以前住响樓下的金毛阿高罵不還口打不還手架！究竟金毛的真性情係點？會否有隱性失控基因呢？




咁我哋史納莎會唔會咬人呢？我蘇菲話：會架！


細個時，我覺得媽媽隻腳趾公好好咬架，無聊時一邊睇電視一邊「損」就最開心啦，好味過牙擦骨呢！大個咗咯，就多數損自己腳趾，而且我哋會不斷發掘啲好玩既嘢，例如「趙」吓梳化啦，撕吓報紙雜誌，挖哂毛毛拖鞋入面啲棉花出黎，咬甩公仔啲眼睛、鼻哥等等。雖然都係用口咬，但就唔咬人。



而再大個啲咯，我就同迪奇哥哥玩打交，或者你ung我、我ung你咁之類，好激烈，好開心架。今晚我哋又開戰啦，玩咗成粒鐘都未攰，梗係啦，迪奇哥哥做完手術媽媽將我哋分開咗幾日，之後牠又要戴頭罩，媽媽又實施禁玩政策，我哋都餓咗好耐咯。今天終於解禁，我哋當然喪玩六十分鐘！

喂，你唔好睇我哋玩到好似好三級咁，其實我哋無嘢架，我蘇菲仍然玉潔冰清，still virgin！

診所嘉年華

媽媽好唔明，點解我咁多次去覆診，周醫生第一句都係問：「點呀，迪奇好番啲未呀？」又或者：「迪奇情況點呀？」

媽媽心諗：「我又唔係醫生，點識喎，乜唔係你話畀我知咩？」於是就提高聲調話：「你睇吓啦。」醫生隨即幫我檢查，拿起儀器幫我左照右望。等了十、九幾日，周醫生今日終於講出媽媽最想聽的話，「迪奇隻眼睛清咗好多，無咁濁啦。」

嗱，我都話媽媽你唔駛擔心啦！得到醫生confirm，從今天起可以大幅減藥，紅色蓋藥水改為隔日一次(之前一日兩次)，奶白色藥水改為一日兩次，藥丸呢就隔日一次每次一粒。咁媽媽你唔駛咁辛苦遲到早退趕番黎服侍我啦！

其實媽媽未去前都有啲擔心，因為我左眼好多紅筋，思疑發炎情況變嚴重，幸好醫生說：「這是正常的，因為手術線開始溶，所以附近會起紅筋。」「吓，乜唔係唔駛用線，個傷口細到會自己埋口咩？」「唔係，你估係人的白內障手術咩！」

係，媽媽係咁諗。但既然周醫生認為大有進展(其實係媽媽認為)，她就放心兼開心。而今日診所內都是友善的朋友，包括十四歲仍然好有火成日吠人的poodle伯伯，好高大眼又大超可愛的兩歲大古代牧羊仔仔，仲有四隻兩個月大的poodle BB來打針，一室樂融融，好似一個小型嘉年華，比上次有位怕我「哄」露出一臉嫌惡的女狗主和釀成血案的金毛和牠木無表情的女主人，氣份真是好多了，所以媽媽和我的心情同樣咁愉快，幾乎要唱住歌咁離開診所。

汪汪，既然心情好，不如補一補，我好耐無食牛扒啦，聽日有無得食呀？雞脾我都唔介意架....

嚇死人陳方安生頭

不經不覺，割完白內障至今已經差不多三個星期，明天又要覆診啦，希望迪奇哥哥去到診所唔好咁激動，搞到隻左眼爆晒微絲血管咁番黎。

其實這陣子媽媽都依舊每天好小心咁幫迪奇哥哥每日三次用暖水紗布敷眼做清潔，又定時餵藥滴眼藥水，但總是覺得眼睛好多紅筋，好似爆咗好多血管咁，同沒事的右眼比較，真係好紅好得人驚！但迪奇哥哥睇嘢又唔覺有問題，唔會亂咁撞，又唔會行唔到直線，依舊鬼死咁遠見到有人行過就引吭狂吠。而上幾次覆診時，醫生亦話：「佢左眼睇到嘢。」媽媽暗地裏「唓」了一聲，心想睇到嘢唔代表睇得好，亦唔代表睇嘢清楚過未做手術前。

媽媽我知你個心係擔心，於是整鬼又去電咗個「陳方安生」頭，諗住番黎嚇吓我地兼睇吓迪奇哥哥眼力好唔好認唔認得出呢個係媽媽？你都傻既，我哋認人係憑氣味、憑聲音的麻，你唔記得你架車番到大閘門口，我哋已經認得出係你兼跳上梳化背「裝」你咩？

其實媽媽你唔駛弊翳啦，我地食得瞓得吠得玩得，你睇我每日咬住公仔撩迪奇哥哥玩，佢依舊好起勁咁追我，最近仲有番興趣捉我黎「ung」吓添，證明我地生活愉快啦。

今晚都係早啲抖，聽日覆完診等你好消息啦！

玩瞓覺

媽媽成日問我哋，究意她每日出門口番工之後，我哋响屋企做乜呢？

其實好多事可以做的，除了你咬我我咬你玩到碌地、吠經過的陌生人、爭搶公仔、拖浴室門口地氈出黎玩、撕報紙雜誌外，其中最主要的活動，就係瞓覺啦。

通常，媽媽唔喺度時，我地多數會在睡房瞓，因為有媽媽陣味嘛。但媽媽在家時，梗係佢去邊我哋就瞓邊啦。而我地又特別鍾意瞓响啲有瓦遮頭的地方，例如櫈底，牀下底，咁先夠安全感。

而睡姿方面，我蘇菲有時伏住黎瞓，但多數打側瞓。迪奇哥哥雖然都經常打側瞓，但更多時候係四腳朝天咁瞓，將肚皮和啷啷暴露於人前，好鬼麻甩feel，有時仲會打鼻鼾。聽聞遠古時代男仔由於要保護女仔，所以瞓覺時要大大聲咁打鼻鼾，利用啲鼻鼾聲嚇走怪獸，所以，今日打鼻鼾的都是男人。

咦，迪奇哥哥又打鼻鼾啦，睇黎佢都係想保護我，好啦，我唔怪你失禮人啦~~~~

小黑陪睇樓

據說，地產代理要考牌，但今天沒有agent牌的小黑，見有人黎睇樓，竟然跟埋出去！唔通，佢想同人介紹呢間樓有幾好，間屋起緊嗰陣時佢天天去辣更屙番兩篤尿證明地基無問題鋼水充足？唔，睇黎都係勒。

小黑在本村有個花朵，叫小黑隊長，成日出去行必辣更，巡吓四周有無罪案發生，睇下有無人偷情、偷竊、偷渡以及偷工減料，所以話，有小黑响度，治安都好啲。

不過，小黑就唔係去到邊度都咁受歡迎，有消息指牠在小巴站陪人等車時(嗰的人係唔識得架)，懶親切咁成日「哄」人，啲人見佢係唐狗個心有啲驚，有啲根本就怕狗，有啲人就惡形惡相的趕走佢，據報有人唔鍾意仲會打佢，唉~~~~~

但係另一方面又有好多人錫佢喎，上星期媽媽遲番工在家照顧迪奇哥哥，我們在露台呼吸新鮮空氣時，見到對面屋個師奶請佢食雞條，相信呢啲事經常發生。姜師奶亦話，時不時有不知名師奶鄰居請小黑食燙渣(呢，青紅蘿蔔煲豬輾嗰類，唔怪得佢皮膚靚靚無生瘡屙屎又唔太臭又唔太硬啦)，搞到佢每朝放低的乾狗糧到夜晚仍然原封不動，有時小鳥來訪，小黑仲大方到請雀仔食狗糧添呀！

事實小黑又真係幾得人鍾意的，媽媽開車前同泊好車後都同佢say hello摸摸佢個頭。我蘇菲呢，都好鍾意撩佢玩，因為佢無機心、夠義氣、心地好兼戆直，身形又fit、樣又幾靚仔，係真係幾好架。

唔好誤會，我蘇菲唔會鍾意佢，我有迪奇哥哥嘛。而佢，唔知有無特殊癖好呢？我以前响二樓露台「裝」落去，成日見佢同阿高經常你騎我我騎你的互「ung」玩「斷背遊戲」，核突！喂，出面有咁多靚狗女，快啲出去識番條女做番直狗啦！

血濺太平道

不是我迪奇的錯啊，雖然我是貪玩一點，雖然我知道有些狗狗可能會很兇，有時狗狗主人並不喜歡我，但釀成血案，是我不想的，媽媽請別怪我啊！

真的，真的不關我事。今早我知道要去太平道動物診所覆診，我已經盡量乖，但你知我年少氣盛，每次出親街都異常興奮，有時，不容易控制情緒嘛。如果我沒有見到太多狗狗，我是可以冷靜下來的，但今早實在太多狗狗實在太令我興奮啦，那頭坐在門口附近的金毛尋回犬好有大哥款，我想和牠打招呼啊，那知牠原來惡過華秀隻狗，張口就想噬我，我就....

汪汪汪一輪狂吠後，媽媽把我拉住了，但對面金毛的女主人的手，淌下鮮血，染在球鞋上，然後媽媽急上前向她九十度鞠躬說對不起，之後拉我縮在一邊，然後又再上前再鞠躬再道歉。只見那女主人一邊護住金毛一邊厲住媽媽，媽媽一臉歉疚，這時護士勸媽媽帶我出門口等。

「喂，媽媽，你唔駛咁喎，唔關我事喎，我無咬人喎。」我以無辜的眼神望着媽媽希望她諒解，但她不理我啊！
點解，點解你唔信我，我嬲！




幸好有個伯伯目擊事發情形，向媽媽報告：「唔係你隻狗咬人，我聽到個女人喝佢隻狗話：『你做乜咬媽媽？！』」

媽媽聽後恍然大悟，才知事發時是金毛「衣」起棚牙兇我兼想噬我，我當然即閃，而對方女主人隻手架在中間擋隔，就在混亂當中，金毛噬了她媽媽一啖致血濺當場。而媽媽由於當時背向我沒看清情況，才誤會我噬人。

啍，媽媽你一手湊大我，我幾時發癲唔小心咬親你？就算平日我和蘇菲爭嘢食互噬，我都是就住黎咬，你就知我幾有分吋啦。唉，咁都唔信我，心淡~~~~~~~

趕走金毛飛

開學了，下午的井頭村前前後後終於回復清靜了，那個滿頭金髮的騎單車小惡霸亦沒有再出現。
我蘇菲話你知吖，在八月暑假將完結之前的十幾日，我家經常有個不速之客常來訪──搵樓下肥仔玩。每次來，都搞到家嘈屋閉！點解？
1. 他雖然只得八九歲，但染了一頭金髮，騎着單車高速片來片去，容易傷人；
2. 他每次入來將我們的大閘開了，離開時卻不關大閘，易招賊匪；
3. 他粗聲粗氣兼惡形惡相，嚇得樓下鸚鵡竪起羽毛大叫，影響健康；
4. 傳聞他在村口得勝茶餐廳食嘢唔畀錢，因為他契爺手瓜起輾，神憎鬼厭。
咁佢做乜常來找肥仔？因為他是肥仔的同學咯！但因為外貌像陀地，所以姜師奶禁止肥仔同佢玩，而事實上，肥仔都唔係好想同佢玩。
我媽媽就更唔鍾意佢啦，因為佢每次黎到，都令迪奇哥哥好激動咁狂吠要趕走佢，你知啦，迪奇哥哥康復期間不能激動嘛！

好咯，金毛飛消失(一定消失啦，因為開學要染番黑髮嘛)，我們又可安心瞓晏覺了，ZZZZZ~~~~~~~~

癲婆屠龍記

喂，你係邊位，做乜入黎，係咪想同我玩，係就伸個頭出黎，唔做得鬼鬼鼠鼠！

「嘩，走呀~~~~~」只聽見媽媽依嘩鬼叫一手就抱起我蘇菲出廳。你，做乜咁驚青？

遠離目標物兩呎的媽媽這時鎮定下來，踎低又起身的裝了兩裝，眉頭皺了兩皺嘴又嘟了兩嘟然後向我介紹說：「呢位係簷蛇先生，唔係，應該係簷蛇BB，我無請佢入黎，係佢擅闖民居，本來應該趕佢走，但外面風大雨大，好啦，由得佢啦。」

其實媽媽最憎不速之客，尤其成隻中指咁長的美國曱甴，一見即要置諸死地，但簷蛇先生呢樣嘢，由於殺佢係好殘忍的事，媽媽惟有忍佢。

原來我未出世前，我家曾上演一幕「癲屠婆龍記」──當晚媽媽睇睇吓電視發覺有條黑影由她身後牆壁漸漸游移向」電視機後，她定睛看清楚然後拿起拖鞋對準目標飛擲，「啪」一聲後拖鞋應聲墮地，媽媽再拿起「殺牠死」再狂噴一輪.....在推算過目標物應該唔被掟死都應該被浸死後，她躡手躡腳的向目標進發以為可以收屍，誰不知當她拿起紙巾移近目標之際，那條斷尾忽然彈起，嚇得媽媽退後幾呎！

唉，無辦法，最後她還是到樓下班救兵，請來的是同樣咁怕簷蛇的姜師奶(姜先生要見客未歸家，屋企無個男人真濕滯)。兩人商議後，最後由姜師奶拿起垃圾鏟收屍，然後倒入廁所沖走。

經此一役，媽媽再不敢屠龍，並以簷蛇是益蟲會捕蚊為由說服自己與牠和平共存，雖然，每次見到牠都會嚇到彈起。

媽媽其實你駛乜驚呀，今晚我同你搞掂佢啦。聽日一早，等收屍啦！

落入凡間小天使

唔駛掘隧道，毋須詐肚痛，也不用打獄卒、鋸鐵欄，都可以當當正正離開監獄，阿柑終於出獄了！
我不是阿柑，但我都可以想像得到在漁護署的鐵窗生涯有幾痛苦：見不到主人，沒有人和我玩玩，無得跑，不得咬公仔，還要被人評定為情緒不穩，生死由別人決定，在不知有沒有明天and等死的日子，每分每秒有幾難捱，我蘇菲和迪奇是很明白的。
真不明白，我們的生死要由人決定，而人又憑甚麼決定我們的生死呢？殺了人的精神病人，也會被判終身接受治療，怎麼我們不可接受治療改過呢？我們的生命難道是那麼卑微，死不足惜嗎？
幸好阿柑的新聞鬧得大，有不少人替牠奔走，終於逃過一死，但不知每天有多少在漁護署狗房和愛護動物協會的貓貓狗狗和各種曾被人當寵物的同類，因沒有人認領或被判定不適宜被領養因要安樂死。那些見病見曳或是因各種原因遺棄狗狗貓貓的人，心窩裏頭到底裝了甚麼？是毒草嗎，還是吃人的毒蟲？
幸運地，我們是落入凡間的小天使，雖然偶有破壞，但媽媽永遠把我們當寶貝，只是我們有時會病嚇壞媽媽。

迪奇哥哥，你要快啲好番，我們繼續雙劍合壁跳上跳落飛來飛去狂吠陌生人做媽媽的活潑健康小天使啊！