青森來的棒球密瓜

媽媽放假第二天，天氣酷熱依舊，仍然三十幾度熱死狗無命賠(雖然朝早灑過幾滴雨，但不足以降温)，不宜外出行街被無情毒太陽亁烤，咁我們陳家迪奇與蘇菲到底有何消暑良方呢？


答案是，登登登~~~~~~你都睇到啦，媽媽今天為我們帶來日本青森懸的棒球密瓜，外皮白白地色兼滑溜溜，和阿笨與阿占在公公家千辛萬苦運回爸爸家的皺皮紋密瓜不同，亦不是傳聞中好甜好甜的夕張密瓜(這種好貴的，媽媽話响citysuper賣成三百幾蚊一個)。


這個青森懸來的密瓜，放在雪櫃內冰了一整天，晚飯時間出埸，唔，我估一口吞下應該透心涼！

和平時一樣，媽媽在廚房切切切時我們已伏在地上痴痴地等。經過上次我地連皮都吞埋的猴摛食法後，佢證實我地係唔識「刨密瓜」，因為我地唔係「西瓜刨」亦無「密瓜刨」因為史納莎無哨牙，媽媽切完圖中哈哈笑形密瓜片後，仲要去皮兼粒粒，然後你一塊呀我一件呀蘇菲一口呀咁三口子一齊食囉。


睇到呢度，你一定會問，咁青森密瓜好唔好食吖？答案係──「清─甜」，媽媽又扮晒食家咁話喎！


佢話，頭幾啖入口好清，但食多幾口就唔覺甜，而且無厘密瓜味。佢記起佢個食家老細梁家權(呢，專寫菠蘿包碗仔翅同麥芽糖嗰個呀！)講過：「日本水果得個甜字，但無乜果味，好似宮崎杧果就甜得黎無杧果味。」


但係，呢個青森來的密瓜連甜味都無乜喎，唔通媽媽被搵笨？青森最出名的是蘋果，佢就買個密瓜番黎，睇黎都係畀人昆！


其實都無所謂啦，食乜我地都咁捧場，咁開心。我迪奇唔揀飲擇食，蘇菲就更饑不擇食，連生勾勾的西蘭花都走去噬兩啖！媽媽，請給我們不甜的西瓜密瓜乜乜密密瓜.

鹿兒島和牛之味(二)

.

.........，當媽媽在廚房煎煎切切時，我地已經雙雙坐在廚房以亮晶晶又水汪汪的盼望眼神等候，期間牛扒釋出的香味令我哋不停lam脷兼吞口水，快啲啦，得未呀！


Well，大約半小時後，美食終於端到我們的專用餐桌前，我們出名是「速食」怪獸，當飯兜一放下我們便以九秒九極速吃完！嘩，正！


不要以為我們狼吞虎嚥便食不知其味，其實我們絕對分得出好味與唔好味。話你知，我們犬界對於食物的訐價，是以「食速」來計算的！對於超好味的食物，我們「食速」是九秒九(每五十克)，好味的就十秒十，普通的十一秒十一，少少好味就十二秒十二咁如此類推囉！吓，複雜？咁簡單的數你都唔識計，死蠢！


咁，人的評價又何呢？媽媽扮晒食家咁同我地講：「鹿兒島來的和牛因為油份高又分佈平均，所以入口時甘香無比，而她又煎到啱啱好，外層香脆內層肉質嫩紅可謂滑不留口！不過，論到牛味，還是美國的肉眼扒好味。」


咁，下次仲食唔食？你食啦！你食我地就有得食！而且我地食乜都無所謂，理得佢係乜牛物牛。請問，聽日可唔可以食ribeye呢？三成熟吖唔該！

鹿兒島和牛之味(一)

一年一度，媽媽又放年假了。


「放假你去邊度玩呀？」在她交待放假期間的工作安排時，身邊的人總這樣問她。這句說話的潛台詞是──「你去邊個國家玩」。彷彿，一放大假就要坐飛機離開香港。若沒坐過飛機離過境，彷彿就沒有放過假。乜香港有怪獸嗎？家裏有鬼嗎？放假一定要離開自己的家，一定要出國嗎？


媽媽才不會呢，她向我們承諾過，在我們年紀還小時，盡量不離開我們自己死去玩。因為她知道，她離家三日，我們便會發癲，又會扮狼叫，又會絕食...為免我地唔開心，她梗唔會自己死去玩。就算要玩，都帶埋我地去啦！希望遲啲有寵物出國旅行團，到時我地一家三口就可以去見吓世面咯。


不過說到見世面，又唔一定要出國喎，好似今日佢放假first day，就去咗鹿皃島──呀，唔係，係去咗日本──百貨店西田──個超市，帶咗一大件日本鹿兒島和牛西冷番來同我地慢慢歎！


嘩，和牛，我迪奇仔咁大個仔都未試過，唔知係咩味呢？唔知有冇上兩年媽媽响新港城街市肉檔買嗰啲打邊爐肥牛，或者鮮嫩牛柳咁好味呢？其實我地都好回味，嗰時幾乎個個禮拜日都有得食，後來因為我勁甩毛，媽媽思疑同食得太多含豐富蛋白質的牛肉有關，就咁，超濃味兼嫩滑牛柳就成為「只能回味」的美食了！


今日，美食重臨，呀，唔係，簡直係從天降臨，我地當然熱切期待.......(待續)

救急凡士林

家居意外，或是頭暈身慶，在人類世界中，最重要有一支白花油看門口，所以歌仔都有得唱：「來簡約地~~愛多八十年，態度未曾改變~~~~」雖然每次媽媽同我地聽到呢支歌都嘔嘔地，但試問誰的家沒有白花油。

不過，有狗狗的家，我相信就一定有一支「黃油」！黃油是一個統稱，是一種黃色液體，當有蚊叮蟲咬擦損遺爛紅腫含膿等，都可以治理，迪奇哥哥就因為有皮膚敏感常起濕疹而經常搽。不過，最近才發現，原來仲有一樣叫凡士林的東西，一樣要常在家。

話說一天早上，媽媽侍奉完我地吃早飯兼執完屎後，赫然發現迪奇哥哥的「啷啷」露了出來。媽媽根據以往經驗，明白年輕力壯的麻甩仔早上起床後偶有此情況，沒有太驚慌，只要等一陣它就會縮回肚內。不過，這天她熊貓又睇完衫又換完妝又化完，「啷啷」仍不肯回家，媽媽再等了一陣見勢色不對，兼記起《狗狗急救大全》中有一種箍死「遮遮」的急症，所以急急打電話到獸醫診所求救。

「我迪奇仔咁咁咁咁............下，唔係下嘛，塞佢番入去？我未試過喎！」她拿著電話大叫！之後我看見她開了門，聽到她急急落樓下，然後又急急回來。這時她手裏拿著一樽野，然後一手抱起迪奇哥哥，粗暴地將牠翻轉，然後伸了兩隻手指從那樽野撩了一抹東西出來，然後往「啷啷」塗呀塗的.....咦，好核突姐~~~~~~~~~~~

「搞掂！」半分鐘後媽媽又叫，迪奇哥哥一個翻身就逃。我偷偷地「裝」了一下，咦，啷啷不見了。

自那天後，家裏就多了一瓶凡士林，英文名叫vaseline，藥房叔叔叫佢做花士令。

速食

你知道甚麼叫「速食」嗎？不是吃微波爐叮叮食物或是吃個麥當當餐啊！在我們犬界，「速食」有另一解釋。請看以下例子──

我樓下的阿高(金毛尋回犬，現已般往元朗婆婆家住)，曾經創下一口氣吞下直徑約八吋深四吋的大湯碗內的白汁雞意粉，所需時間不詳，據說是牠媽媽上了三樓鄰居處寒暄的幾分鐘吧！當然，牠飽嚐口福後，翌日就有牠好受，拉得一地都是屎！

迪奇哥哥呢，小時候就在籐椅上衣衫雜物堆中找到一包不知何時買回來的澳門特產雞仔餅，又在短時間內把它消滅。由於沒有飲消滯茶，翌日「吽」了一整天，甚麼都吞不下。又有一次，牠看見廚房地上放了幾個長方形的紙盒，於是抓呀撥呀壓呀撕呀的，竟然有些白色甜甜像牛奶的東西漏出來，又以最快速度把它舔清光。

而我呢，有幾次發現垃圾筒內有香香的東西，我就一口咬着垂了一半在外的垃圾膠袋，拉呀扯呀的就可把蓋弄開，在媽媽發現前將香香的東西吃下肚，呵呵呵！

其實我蘇菲的「速食」速度是很厲害的，媽媽曾幫我計時，我大約只需四十秒就可以把一碗切碎的牛扒肉吃掉，比迪奇哥哥快十幾秒呢！

由於廚房有好東西吃，所以每次媽媽在廚房準備食物時，我們都伏在她腳邊，等候最新鮮的食物。就算不是為我們準備的，她偶然不小心掉了一些下來，我們又極速幹掉。

今天晚上，媽媽在廚房切切切，一定又有好東西吃了。看真點，嘩，原來是阿笨與阿占吃得好滋味的密瓜啊！我們有口福了！

咦，怎樣這次媽媽沒有切粒粒，你知我們的犬齒只能撕和切斷食物，但沒有臼齒來磨碎食物，我們只懂吞而不懂咀嚼，你叫我們怎吃呢？但我舔，嘩，好清甜啊，我咬我吃我吞.....喂，你這時才要切粒粒，不，不要取走我的密瓜，我咬咬咬吞吞吞，嘩，把它幹掉了？

甚麼，媽媽你找密瓜皮？咦，有皮嗎，怪不得我剛才吃下時覺得有點粗粗的，啊，弊，明天我會拉肚子嗎？還是會便秘~~~~~~

自由行

自由何價？你有自由嗎？

吖，我們不是關在籠內的小狗啊，我們在家絕對有自由，包括進媽媽房，上媽媽張牀，坐梳化，有自己的獨立狗廁所，這比很多狗狗整天只能在兩尺乘呎半的小籠內生活，在家中忍忍忍忍到主人回來才有得去殊殊的禁制多多的生活好得多了！

不過，我們並不擁有絕對的自由，我所指的自由，是出街的自由。

我相信自由是要爭取的，像樓下的唐狗小黑，經常趁主人外出時掙脫圍在頸項上的鐵鍊，然後用前腳撥開鐵閘，外出四處浪盪見人搖尾見狗就聞下咁又過一日，幾開心呀！我蘇菲和迪奇就沒有這些自由，因為我們不是住屋外，而在住屋內，未學懂取鎖匙開大門(雖然電視廣告中的史納莎乜都識做)，所以唯有乖乖在屋內活動啦。

有幸去街咯，好似今日，我們又去了西貢海濱公園，又要套上胸帶，在媽媽四呎半徑範圍內活動。點解，點解唔可以畀我哋四圍走，點解，點解要將我們留在你腳邊？汪汪汪？

係，我哋興奮時的確會喪跑兼喪吠(縱使面對的是惡如華秀的狗)，有時會愈走愈遠，甚至走近叢林就黎消失咁款，但都唔駛將我留在你腳邊吖？

幸好，我蘇菲一直表現乖巧，一叫就聽，所以媽媽今日就大膽咁解開我的胸帶，任我自由行，嗅嗅青草味，追追沿途遇見的小狗兒。

哈，雖然我不是如小黑般用武力爭取，但我同樣有四處浪盪的自由啊！

迪奇哥哥，你要向我學習了，叫極唔聽懶有性格，唔及我無厘性格一叫就聽咁討人喜歡呢！

 

• 寵物, 
• 消閒嗜好

季節限定陽光半小時

熱屎辣辣，出街隨時中暑，不過，原來不出街把自己關在家，一樣會出事。

媽媽說，今天報載一名婦人大熱天時困在密封斗室內，結果焗到中暑！嘩好慘啫。

其實我們做狗狗的最怕熱，因為我們全身只得腳板底及條脷呢兩個咁丁喙的地方可散熱，加上披上一身毛，吸熱力強散熱力低，所以夏天出街隨時中暑。尤其我迪奇仔，就特別怕熱。

記得我細細個時，媽媽帶我到家附近的沙灘散吓步，玩吓水咁，沿途毒太陽無處不在，曬得我背脊可煎蛋。我頂唔住，所以一見有架車在附近，我即閃身伏在車蔭下，伸長條脷歇一歇。之後再行兩步，見到有棵樹，嘩，當然又閃埋一邊抖一抖。

媽媽見我咁辛苦，之後都無乜在毒太陽高掛下帶我去街咯。所以，夏天我就好少出街，太陽都好少曬。

現時每日見光(太陽光)時間，季節限定半小時──媽媽早上起身後趁外面氣溫未到三十度，打開露台門給我們抖一抖，吸一吸新鮮空氣，吠一陣對面屋的惡犬及其新同伴小黑狗，然後再跑兩嘢，我哋己經feel到熱力逼人。這時媽媽已開大冷氣，我們自然乖乖回朝降溫兼吃早飯。

半小時陽光你話夠唔夠？唔知喎，不過如果一邊曬太陽一邊有冰凍西瓜，我想，多多都不夠啊！

喂，蘇菲，乜你仲曬唔夠，好快啲番入黎啦~~~~~~~~~~~

 

• 寵物, 
• 消閒嗜好

咸濕與笨七

有些事情，是我們寵物犬界無法明白的，就算我們是聰明的史納莎。

我個白癡媽媽今天下班回來哈哈哈的問我們：「你們猜今期誰最紅？」

我們側頭想了想，不是樂樂和盈盈嗎，你這幾天仍在看熊貓台啊！

白癡媽媽又哈哈哈笑了幾聲，她說：「最近最紅的除了熊貓，還有兩個用叠字為名字的少女啊，上星期最紅是yoyo，這個星期最紅是coco，兩人都聲稱被身邊的男人累死啊！」

是嗎？我蘇菲汪汪汪敷衍地回應了幾聲，扮作明白，迪奇就頭岳岳，一副啋你都傻的模樣，二話不說就走開了。我就眼神疑惑留在原地，媽媽就捧著我的臉蛋大發偉論：「天下男子都是性咸濕，但最差是咸濕得來又笨七！你呀，要好好看管你的老公仔啊！」

啊，這個當然啦，每次有女埋我老公仔身，我就汪汪汪兼胡胡聲咁嚇走佢啦！

不過，甚麼叫笨七呢，為何不是笨六或是笨八呢~~~~~~~~~~白癡媽媽，解釋吓好喎~~~~

狗狗人工呼吸

前兩日，媽媽買咗本《狗狗急救大全》番黎晚晩咪，睇到皺晒眉，咁我地又「裝」下本書講乜啦──嘩，原來講頑皮狗狗咬電線被電親，貪玩衝出馬路畀車撞倒，跳入洗衣機被fing到頭暈，隨街亂食嘢中毒，嘩，仲有生cancer，畀其它狗咬，跌斷骨等等等點急救喎，我地係咁咦「裝」下都覺得心寒，唔怪得之媽媽睇到面色都變埋，我地估佢梗係一路睇一路想像我地遇上同樣情況時的慘況啦~~

其實計我話，乜都假，最緊要第一時間睇醫生。我迪奇到咗陳家後都睇過唔少次醫生，多數係生濕疹。媽媽都算係咁，見我有乜唔對路，即刻半秒不遲疑帶我見獸醫。最近一次係上個月打完一年一度防疫針後出現敏感，全身現紅疹，痕到死，佢見我响牀典吓典吓轆來轆去就知唔妥，打完個電話問咗幾句就送我去旺角二十四小時診所。好彩，去到後我的疹漸漸退晒，媽媽見我無乜事就番家咯。

而之前最勁一次睇醫生係fing爆咗左耳的微絲血管，耳仔脹到好似個波咁，媽媽急送我到診所，獸醫話要做手術放血，好大劑！手術之後戴頭罩戴咗成兩個星期，等啲血水慢慢流晒出黎，勁慘！唉，可能我多病痛，所以媽媽買本急救手冊黎看下門口啦。不過講到尾，都係要及時睇醫生！

媽媽話我未出世時，樓下師奶曾經响愛護動物協會領養咗隻牧羊狗，媽媽朝朝番工前都會叫下佢。幾個月後，媽媽出完trip番來，發覺唔見咗牧羊，後來先知已經死咗，佢都傷心咗一陣。

媽媽話我知呢，寵物有病變嚴重或者病到無得醫，主人有好大責任。正如我當初fing爆耳殼，慢慢積血，過程有一定時間，媽媽發現時已積咗幾日，佢好內疚自已無第一時間發現，怪咗自己幾日。呢，好似樓下牧羊咁，媽媽話佢臨出trip時已見佢唔多妥，叫佢都唔起身，呢段時間無理由佢主人唔發覺架？既然見到，又為何掉以輕心唔帶佢睇醫生check清楚呢。

所以，媽媽係時刻都留意到我地有無唔妥的。

咦，媽媽你做乜望住我？吓，唔係麻，你要學本書講的「狗狗急救法中之人工呼吸」？咩話，你話用手握住我個口然後吹氣入我鼻？喂，你唔好亂黎喎，咪呀，我閃~~~~~~~~~~~

 

• 寵物, 
• 消閒嗜好

熱辣辣 去旅行

很久沒離開過井頭村的家了，好想去街街，好想在草地上喪跑，好想吹一吹海風，好想和其他狗互吠，好想結識新朋友.......

但，香港地，其實又幾多狗狗好去處呢？首先，所有公園唔准入，商場唔去得，沙灘亦唔去得，去得的地方十隻手指數得晒。拿，咁耐以黎，我(迪奇，當時蘇菲未出世，佢好多地方未去過)只去過彭福公園(可惜要搞奧運馬術而封到幾年後)，去過遊船河，上過一個响甕缸附近的沙灘，去過西貢市，行吓街咁囉，又好似去過中環，睇聖誕樹，去過大尾篤喪跑....係咁多咯，你睇我幾鄉下狗呢！

早輪灣仔狗公園開咗，以為媽媽會帶我地兩個去啦，點知有日佢番黎話：「哎呀，嗰個狗公園你地唔好恨呀，家陣熱屎辣辣，嗰度樹又無棵，涼亭又無個，曬死你地呀！」我地汪汪汪問真係咁差咩，佢話當日佢搭巴士經過見過公園，雞到不得了，又隔涉，同彭福差得遠，啲報紙仲煲到鬼咁勁，叫我地真係唔好恨，佢話遲啲帶我地去啲好啲既地方。

OK，我地繼續等囉。

今日，佢好鬼高興咁放工番黎話喎，有個叫蔡子強的朋友講...吓，你唔知邊個蔡子強，呢，嗰個中大政治系講師，又係乜乜政治評論員，頭頂無乜頭髮果個呀，佢呢，就係寫書評的，佢話畀媽媽聽，佢有一個朋友就黎出一本書，書名叫「帶goldi去旅行」，goldi係狗名喎，我相信佢係一隻金毛尋回犬囉。本書呢，係佢帶goldi去過玩的地方，仲有goldi對嗰啲地方的評價。蔡生話呢，本書出版咗之後就會送一本畀媽媽囉。

嘩，聽到呢個消息真的令狗興奮啊！我地相信，佢會跟住本書所述地點帶我地去玩囉....快啲，快啲，快啲出書啦~~~~~~~~~希望本書介紹的地方唔好咁雞囉，如果唔係，媽媽會殺人的！噢，打錯字，媽媽係唔會殺人的，但她會「小」人啊~~~~~

 

• 寵物, 
• 消閒嗜好

邊個最紅

這陣子，動物界中你說最紅是誰呢？你不知？唔係下麻~~~~~~~~~

我的白癡媽媽呀，從六月底開始就天天看大熊貓樂樂盈盈的網誌。昨天早上一起牀就看now寬頻的503熊貓台，仲睇咗成朝。我以為有乜好睇，咁我哋又睇吓啦，車，佢地兩個成朝係度瞓覺，唔多郁，咪好似我地咁之麻，都唔知有乜好睇，睇我地好過啦！

由於這段日子媽媽沉迷睇熊貓，又走去買熊貓tee，成日好似鬼咁高興，睇住503見佢兩隻肥貓你咬我我咬你你撞我我搵個屎忽得開你咁又一日，我哋都抵唔住，我地成日都係咁玩架啦，好好睇咩，睇我哋仲好啦！有見咁此，所以，我哋都要開番個史納莎迪奇與蘇菲網誌，發洩吓！

其實我哋不知幾咁可愛，你估淨係你大熊貓先可愛咩？其實你哋新屎坑啫，媽媽一早買咗唔知幾多件汪汪print tee啦，講到得寵，梗係我哋多啲！唔信，遲啲我上多啲照片證明啦！