王子的心意

給家有惡貓/驚青貓的家長：
話說王子前年冬天到我家暫託後，一直唔喜歡人類摸，唔喜歡人類親近，平日鍾意哩埋一個安全位置，到開飯時才出來。其後搵專業的傳心師朋友幫忙，了解到王子認為自己係高貴的白貓，人類不能立亂摸，於是奴才我，無再冒犯王子。
王子亦話畀傳心姐姐知，唔知點解黎到現時居住地方(即是我家)，其實佢自己識照顧自己，唔駛人類關心。不過，入咗我家後感到最安心的，是下雨天時不再擔心沒有地方躲藏，現在可以在軟淋淋的墊上看雨景和在雨中瞓覺！
我了解到王子的心意後，沒有再胡亂摸他，任他安心在家生活，有時奉飯，會被王子打一下，奴才默默承受，只要王子安心便是了...........
直至有一天，奉飯時忽然聽到王子打咕嚕，很輕聲，奴才以為是其他貓，細心聆聽才知是從王子喉嚨發出。

最近王子又傳了一次心，因為奴才想知道王子對生活滿意否。王子告訢傳心姐姐，話對飲食非常滿意，因為經常有不同新零食。而對我這位家長，王子亦說媽媽有時會好惡咁鬧貓，咁係無用架，貓被鬧時只會驚一陣，但之後又會唔記得，依然故我，所以，佢認為我不要鬧貓，慳番啖氣，貓曳時不妨整蠱佢，向其他貓派零食但曳貓無份食，咁曳貓先會記得教訓。
你哋話，王子是否是智者？
其實，每一位毛孩都有自己的想法或不同的過去，每做一件事都有原因的。而王子今天可以放鬆的躺在窗前的墊子上看外邊的傻雀，每天早上坐定定要奴才摸，仲會舉高pat pat示意要從頭摸到尾，能有這樣的改變，除了奴才有耐心，更重要是奴少有一份尊重的心，尊重動物的想法。當你懂得從動物角度出發，你自然知道怎樣對待動物。